Böyük şirkətlərdən ‘Ford Motor Company’ bu rejimə keçən ilk şirkətlərdən biri olmuşdu. Hətta şirkət eyni zamanda işçilərin də maaşını iki dəfə qaldırmışdı. Bu addım bəzi gözləntilərin əksinə ona itkiyə yox, böyük qazanca gətirib çıxardı və məhsuldarlıq yüksəldi. Şirkət daha sonra o dövrdə daha bir radikal addım atdı. İşçilərə həftədə 1 gün yox, 2 gün istirahət verdi və bunu işçilərinin özlərinə daha çox vaxt ayırmasına imkan yaratmaq üçün etdiyini bildirdi. Əslində Ford bu addımla işçinin maraqlarını qorumaqla həm də öz maraqlarını qoruyurdu. Şirkət olaraq bu məsələyə çox geniş bucaqdan baxmışdı. O insanlara sadəcə işçi kimi yox, istehlakçı kimi də baxırdı. Boş vaxtı olan insan həm də məhsul almağa və iqtisadiyyatı canlandırmağa səbəb olacaq. Bəlkə də həmin şəxs Ford-dan bir maşın alıb həftədə boş olan iki gününü harasa gəzintiyə çıxacaq. Heç bir yerə getməyib, bütün günü işləyən insan niyə maşın alsın ki?! Beləliklə Kapitalizm maraqları bu yolla da təmin olunacaq. Bu addımlar həftədə 5 günlük 8 saatlıq iş rejiminin yavaş-yavaş formalaşmasına da səbəb oldu.